طائرة اوباما تهدد الديمقراطيين في انتخابات التجديد النصفي

اثارت تعليقات الرئيس الأمريكي باراك اوباما الكوميدية العديد من الأحتجاجات و الأعتراضات واسعة المدى في الولايات المتحدة

جائت التعليق الفكاهي للرئيس اثناء زيارته لولاية لويزيانا

و اثناء جلوسه مع احد المواطنين البسطاء في احد بارات نيو اورليانز لتناول كوب من "الجعة المثلجة" ( هدية مني للي يقولي لية بيقولوا جعة مش بيرة)

سأل الرئيس المواطن البسيط انت ازيك و ازي العيال و الذي منه اجاب المواطن باننا شاكرين افضالك يا سيادة الريس

و تابعه  اوباما بسؤاله انت منين اصلا بقا يا بلديتنا فاجاب المواطن البسيط بانه اصلا من  فلوريدا و بيقلب عيش في لويزيانا

اجابه اوباما جدع  يا كيرك ( اسم المواطن البسيط)

و بتروح بلدكوا فلوريدا ازاي

اجاب كيرك بالطيارة سعادتك

ليطلق اوباما قنبلته "طيارة من اللي بيخبطوا في الأبراج دول " هاههههاهاهاهاههاها

ليدخل الحاضرون في نوبة ضحك هستيري معجبين بخفة دم الرئيس و حضور ذهنه

كانت تلك الشرارة التي اشعلت موجة الأنتقادات السابق ذكرها

و في مكالمة تليفونية مع لاري كينج قالت ماري اوزيل  والدة  احد ركاب رحلة يونايتد ايرلاينز 175 المنكوبة ان ما قاله الريس شئ لا يغتفر

و واثقة من ردة فعل الشعب الأمريكي في عقاب مؤلم للديمقراطيين

 بينما اعربت كريستين ماليبو صديقة احدى العاملات بمبنى التجارة العالمي انها و العديد من اقارب الضحايا سيتخذون مواقفا حازمة من تلك التصريحات

 في حين كان رد فعل فيتو ميرسانلي والد احد الضحايا اشد حيث توجه للبيت الأبيض و ظل لمدة 4 ساعات يتوجه بالسباب البذئ بالايطالية و الاشارات الخارجة للرئيس و كافة العاملين بالبيت الأبيض

في حين جاء رد الفعل الرسمي عن طريق روبرت جيبز المتحدث الرسمي للبيت الأبيض

قائلا ان تصريحات اوباما طبيعية للغاية و مستعارة من احد الزعماء الذين يتخذهم اوباما قدوة لهم

باعتباره رمز الريادة و صاحب الضربة

الأرضية ( مش الجوية اهو سيبوني في  حالي بقا)

و  لم تثر تلك التصريحات ادنى استياء لدى شعب ذلك الرئيس

رغم ان حزبه مقبل على انتخابات و تبدو المؤشرات لديهم مبشرة باكتساح

حيث ان شعب ذلك الرئيس في قمة الاحترام و ظبط الذات حيث لم يتقد احد اصلا بالترشيح الا قلة مأجورة و هيسقطوا

و ابقوا قولوا روبرت قال

الاهرام فوق الجميع.....فامبير و لا نسي ظله

الناس دلوقتي مبهدلة الاهرام علشان قال اية نزلو صورة الريس من غير ظل

و قال اية بيتهموهم تنهم مفبريكنها

و الله عيب

دي الأهرام

عارفين يعني الاهرام

يعني مش هرم واحد و لا اتنين و لا تلاتة دولة شلة اهرام

يعني المصداقية يعني الامانة يعني ابراهيم نافع يعني الخطيب يعني حسن حمدي

الأيد القصيرة اة الطويلة لأ

ادي اللصور يا جدعان

 

قال يعني بتوع الأهرام فبركو الصور عشان بدل ما الريس يمشي ورا في الصورة الأولى

يمشي قدام

لا و الله

الأهرام اكبر من كدة يا سادة(سادة و لا سكر زيادة )

انا من رأيي انها على الريحة افضل

قصدي ان دة مش ممكن

ما اية يعني الريس بتاعنا يطلع من غير ظل

فيها اية يعني

ما في ناس من غير ظل عادي جدا

صحيح بيتقال عليهم فامبيرز بس دي اشاعات مغرضة

 

 

هوا عشان مثلا بقاله 40 سنة بنفس الهيئة يبقا فامبير كلام فاضي طبعا

طيب انا اعرف اصحابي فامبيرز و معجزين جدا و شعرهم ابيض و حالتهم كرب

و كمان الفامبير عندهم حساسية من التوم

صحيح ان الريس مبيقدرش لطشة الملوخية على حد قول الأستاذ الكبير مستر اكسلانت كات

و هيا كلها توم

راجع المقال العظيم من هنhttp://adham2009.blogspot.com/2008/11/blog-post_28.html

 

بس الي بينفي كدة وصف ممتاز نفسه للريس ان لابس دبلة فضة و مش راضي يروش نفسه و يجيب دبلة دهب زي كل الشباب اللي في سنه

 

و طبعا الفامبيرز حساسين للفضة

طيب نفسر موضوع الظل دة باية

اكيد نساه عادي يعني ربنا يكون في عونه الراجل شقيان معانا

شعب واطي جايبله الصداع

اكيد نسا ظله و هوا ماشي

عادي يعني

و يا ريت حملات التشكيك في كل حاجة دي تهدى بقا

:((((((

مناخير شيلسي ......و جيمي حبيبي

بما اني  اخواتي توأم و هخضع لرأي الأغلبية يبقا بتفرج على مزاجهم على التيلفزيون

حاجة تموت ناقص عمر للاسف

شوفتوا ازاي الديمقراطية دي حاجة منيلة بنيله

و الحكومة بكل عطف و تؤدة بتحمينا منها(يعني اية تؤدة دي اصلي بشوفها بتيجي ورا عطف كتير)

شعب جاهل مش عارف مصلحته ما علينا

المهم اني بالصدفة شفت برنامج نميمة اجنبي ( the insider) و الحلقة كانت عن فرح بسلامتها بنت كلينتون و هيلاري

المحروسة تشيلسي

اول حاجة صدمتني مناخير البعيدة

شئ مفتقد لاي حس تكويني

و دة بيوضح تأخر جراحات التجميل في امريكا مقارنة بمصر

اللي نص نسوانها عملوا تظبيط لمناخيرهم مش بنت الريس مناخيرها شبه مناخير بينوكيو(ممكن تكون وراثة بما ان كلينتون ابوها كذاب و بتاع و مونيكا و قلت و ادب و دياوله)

و طبعا انا عبيط فاكرها معملتش عمليات

طلعت البعيدة عاملة 31 عمية في مناخيرها

البت دي زمانها بقت مدمنة بنج

واضح ان تأثير بينوكيو مفيش حد من جراحين التجميل قادرله

شوفوا البنت دي اتركبلها مناخيرات كتير و مفيش حاجة نفعت

ما علينا بيقولوا قال اية  قال اية الفستان ب 20 الف دولار بس اة و الله 100 الف جنيه يعني

اللي هوا اي بنت رجل اعمال فكسان في مصر مترضاش تلبسه

و ممكن تنتحر فيها و تاخدلها شريطين زولام و لا حاجة

اة و الله و امها الفستان بتاعهايقدر ب 4000 دولار اة يا عيني هيلاري بجلالة قدرها مرشحة رئاسية و وزيرة و سيدة اولى سابقة

 طبعا متكلموش عن بدلة ابوها و لو ان شكلها من ام 200 دولار في ماركس و سبنسر

الفستان مفيهوش فص مجوهرات يا قلب امها

شايفين قلة القيمة الراجل مقلول قيمته

حاجة تكسف شعب قالل قيمة رموزه الشعب الأمريكي دة

شوفوا عندنا

ازاي مدلعين رئيسنا و عامللينوا قيمة وسط اقرانه(اصحابه يعني محدش يفتكرها قرون و لا حاجة عارف نيتكوا زفت زفت)

فرح جيمي اتشهيص

فستان خديجة كان فيه 70 قيراط الماظ

حاجة قيمة و برستيج كدة

طبعا احنا لو ملناش مزاج مش هنعمل كدة

احنا اللي بنحب ندلع ريسنا حبيبنا و ابنه جيمي حبيبي(محدش يفتكر اني قصدي زي ما حمزاوي ما بيقول على جمال مروان في برومو بتاع مودرن اللي بيتكلم عن بوبي الجديدة)

بالمناسبة احب اشارك الصورة دي مع حبايبي و اعزائي

ربنا يجحمكوا يا بنات

:(((((

و احب اعلن اعجابي بالراجل دة و المفروض هوا اللي يتفاهم مع جيمي (جمال مروان مش مبارك برضوا فاهمني غلط)

و طبعا دة كله بمزاجنا

حبيبي يا جيمي :(((

الطب الشرعي و السموم...وجهة نظر فنية

يوم 12 الجاي امتحان الطب الشرعي و السموم

مادة في غاية الجمال مزيكا مزيكا يعني

طبعا كل دفعتي فاكراني بهزر

لكن و الله بتكلم جد

من خبرتي الموسيقية لقيت ان المواضيع المقررة علينا في المادة دي

معظمها اتعملوا اغاني

دة حتى الطب الشرعي اتعملوا افلام و مسلسلات CSI NCIS و غيره  و غيره

بحكم حبي للموسيقى و بشكل الخاص الروك

:((

لقيت مواضيع اغاني كتير  في القصة بتاعتنا دي

 نبتدي بالشرعي و هو اغانيه قليلة بعكس التوكسو اللي اانيه كتير و حلوة :-

اغنية Postmortem لفريق Slayer

http://www.youtube.com/watch?v=FMhXQD_yX34

دوشة شوية لكن مش قضيتنا

اغنية لذيذة لOleander اسمها bruises

http://www.youtube.com/watch?v=KEYGatfkxMI

نيجي بقا لشابتر Firearms هنلاقي اغاني بالعبيط

من احلاهم  دي اغنية حماسية بشكل فظيع

:)))

Bullet With a Name on it لفريق Nonpoint

http://www.youtube.com/watch?v=KEYGatfkxMI

بالنسبة للBurns

مزتي حبيبتي Anstacia عملت اغنية كئيبة على دماغها

و ولعت الدنيا على اللي فيها و غنت لنا مع الشاب السيس Ben Moody

Everything Burns

http://www.youtube.com/watch?v=CuUR7lKFEz0

التوكسيكولوجي بقا اغاني كتير و منها حاجات تحفة بجد دة طبعا بيرجع لحقيقة علمية مثبتة ان معظم المبدعين دول

يا اما مدمنين يا حاولوا ينتحروا قبل كدة و غالبا الأتنين مع بعض

عشان قبل ما ابدأ احب احكي قصة موت Kurt Cobain ملاك الموسقى في التسعينات و المغني الرئيسي لفريق Nirvana

اللي كان الهام لجيل كامل و اخترعوا موسيقى الجرانج ميتال

كيرت كان مدمن هيروين بس كان واعي جدا

و كانت مع حقن الهيروين دايما معاه حقنة جاهزة متعبية Naloxone

المهم لقوا كيرت ميت في جراج بيته منتحر ShotGun Firing

شوفتوا القصة فيها شرعي كمان ازاي

و لقوا جنبوا الحقن فاضية

و بتحليل روتيني لقوا ان الحقن الفاضية حقن منها كانت هيروين اللي هوا متعود عليه

و لكن المفاجأة في الحقنة اللي عليها بلاستر مكتوب عليه Narcan(naloxone)

لانه بتحليل محتوياتها مطلعش نالوكسون خالص دة طلع Fentanyl

فالقصة بقت ماشية كدة

ان صاحبنا قعد يضرب هيروين كالعادة حس انه هيفطس و حب يلحق نفسه بالناركان لكن كان فيه حد بدل الناركان بالفنتانيل

و بكدة مجرد ما استخدم الحقنة صاحبتا فيص

و بكدة اتحولت من انتحار لجريمة قتل

شفتوا ازاي الشرعي و السموم حلو لغز القضية :))))

نتكلم بقا عن الأغاني

اول اغنية hydrocarbon يعني aspiration يعني chemical pneumonia يعني بلاش emesis ولا activated charcoal

الأغنية اسمها Kerosene لفريق Mad at Gravity

http://www.youtube.com/results?search_query=kerosene+song&aq=f

بعد كدة نخش على الشابتر بتاع Organphosphrus and Atropine

نلاقي فريق اسمه Atropa BellaDona لكن اغانيهم في الضياع

و ليهم اغنية اسمها Strmonium يعني فارماكوجنسي كمان :))

بالمناسبة الفارماكوجنسي بقا فيه اغنية بتتكلم عن الخلطة السحرية بتاعت الساخرات في العصور الوسطى كانو بياخدوها عشان يطيروا و تقريبا هما كانوا بيطيروا على الأخرة على طول:)))

و هيا belladona & aconite

ايوة aconite اللي كان مصرين يقلولنا في السكاشن انه خانق الذئب

طيب هوا الذئب هيقعد يفحت في الارض عشان  يطلع الجذر و ياكله و بعدين يتخنق

و بعدين هوا الذئب متعظش من اللي حصل لزمايله الذئاب قبله و بيروح زي العبيط ياكله

و بعدين مين اللي قالهم ان هوا اللي خنق الذئب هوا فيه حد فاضي يتتبع الذئب و هوا بياكل البتاع دة و بعدين يشوفوا و هوا بيتخنق

و بعدين مش حرام عليه يعني يشوف الذئب بيتخنق و متشنتح و حالته تصعب على الكافر و ميروحش يعمله CPR

فين الرحمة يا بشر

بصراحة انا ممكن اصدق قصة لفافة البانجو  و خالد سعيد بتاعة الداخلية و مصدقش حوار خانق الذئب دة

كا علينا نرجع لاغنية  belladona & aconite تاني و دة اللينك بتاعها للي عايز يتخنق قصدي يسمعها

http://www.youtube.com/watch?v=f_Lw5fi13XE

نروح بقا لسم الكلاب

Strychnine

ايوة بقا The Blue Shot

التريكنين في اوئل القرن دة كان من اهم المنشطات في الرياضة و غيره

و حاليا بيستخدم سم كلاب

او بيتحط بتركيز معين على بعض انواع الخمور و بتبقا ليها لون ازرق لتمييزها

و اتعملت اغنية من كلاسكيات السوفت روك اسمها Strychnine

و غنتها فرق كتير لكن انا حبيت اكتر حاجة نسخة فريق The Sonics

http://www.youtube.com/watch?v=f7Nffq0bOgE

نروح بقا للمخدرات

العالمي اريك كلابتون عمل اغنية اسمها Cocaine

تحفة بجد لازم تتسمع

http://www.youtube.com/watch?v=Q3L4spg8vyo&feature=related

و فريق Tool عمل اغنية اسمها Opiate

المقصود بيها عبارة كارل ماركس الشهيرة الدين افيون الشعوب

الأغنية دي بالذات هتكون غير ملائمة للاخوة الأقباط :))

http://www.youtube.com/watch?v=7cvKcMbzN_A

لو عجبتك لازم تسمع دي بقا من الروائع بقا اغنية بجد بتعملي euphoria

http://www.youtube.com/watch?v=OUGbu6Jcrmw&feature=related

 وفيه 3 مزز روسيات من فريق Serebro و انتو عارفين طبعا ان ثقافتي روسي عملوا اغنية بالروسي برضه تخيلوا !!!

اسمها Opium

http://www.youtube.com/watch?v=c0YMgcHRYao

و اغنية اسمها Heroin لفريق the velvet undrground

http://www.youtube.com/watch?v=6xcwt9mSbYE

و فيها وصف من خبير للClinical Picture

نيجي بقا alcohol

فريق StarSailor

فريق كل اغانيه بجد هايلة جدا ملهمش حل

و هعمل لاغانيهم موضوع مخصوص بس اخلص امتحانات

الأغنيى بتاعتنا اسمها Alcoholic

http://www.youtube.com/watch?v=5mtyUMsqQbA

فيه فريق ملوش حل اسمه Scorpions

فريق الماني عظيمة اغانيهم بجد غيرت كتير حواليهم و ليها اقاطات سياسية ملهاش حل

و لما حسوا انهم خلاص بعد 30 سنة مفيش جديد يقدموه احترموا ذاتهم و جمهورهم و عملوا البوم وداعي

يخليك بجد تعيط ان فريق بالعظمة دي هيبطل يبدع تاني

و بعبقرية الأختيار كان اسم الألبوم الختامي Sting In The Tail

فيه اشارة لاسطورة بتقول ان لما عقرب نفسه في ديله يبقا انهى حياته

في اسقاط رائع للنهاية بالنسبة ليهم

 اغنية The Good Die oung موجهة للجمهور ملهاش حل جسمي بيقشعر منها خاصة انها بتمثل امنية خاصة ليا انا

http://www.youtube.com/watch?v=ymfdhBFyc20

بقية اغاني الألبوم تحفة يا ريت تسمعوها

فريق The Verve اللي عملوا التحفة اللي ملهاش حل Bitter Sweet Symphony

http://www.youtube.com/watch?v=qzYwoKu619w

عملوا اغنية اسمها Valium skies

http://www.youtube.com/watch?v=yR67PcuiTV8

نيجي بقا لاحد اشهر السموم في التاريخ السيانيد

Cyanide

سم شهير و فتاك و ذكر في اعمل ادبية كتير و كان معموله فصل في كتاب رائع عن العلاقة بين السموم و الادب و حوادث التسمم الشهيرة

 اغنية لملوك التراش ميتال في العالم METALLICA

اسمها Cyanide

http://www.youtube.com/watch?v=xUMqqVOlJBs

نختم بقا باغنية فيه drug depndence & Hydrocabon & Child Abuse

الأخ EminEm

كانت مامته من الأمهات الوحشين كانت مدمنة فاليوم (Dizazepam)

و كانت بتتخنق من دوشة صاحبنا دة و تحطله هو كمان فاليوم عشان يتخمد ينام

و في مرة حطيتلوا تنر يعني Hydrocarbon يحمد ربنا انه مصعبش عليها و شربته ماء و ملح زي الامهات المصريين الحلوين

كان زمانه aspirated و راح فيها

الأغنية اسمها

My Mom

http://www.youtube.com/watch?v=nBI6J8MzoYY

كفاية كدة اكمل مذاكرة بقا

ارفعوا ايديكم عن محمد علي ابراهيم ايها المغرضين

اية دة بقا حراااام

كل شوية

احنجاج على الراحل و على الجلايدة القومية الرائعة 

"الجمهورية "

لية بس كدة

يعني فرضا مظاهرتكم نجحت و الجمهورية وقفت

انيل انا اية بقا في ايام الأمتحانات دي

اتسلى في اية

مش كفاية امتحان الكومينتي الجملي بتاع امبارح و اللي حصل فيه

يعني انا امبارح رجعت مفرهض من الأمتحان مجرد اعادة قرائة تغطكية الجمهورية لمظاهرة يوم الجمعة اعاد ليا النشاط و البهجة

تيجوا انتو عايزين توقفوا الجورنال يا ظلمة

و بعدين انتو فاكرين اية اللي هيحصل

تروحوا قدام مكتب محمد علي ابراهيم

و تبتدي المظاهرة

يقوم السكرتير بتاعوا يكلموا و يقولوا الحق يا فندم اللي بيحصل برة

و لما الراجل يبص من بلكونة المكتب " اللي اتصرف علية 3 مليون جتيه ايام تجديده في فترة سمير رجب"

و يشوف اليفط اللي بتندد بوصف خالد بشهيد البانجو

و يسسمع الهتافات

يقوم الراجل ضميره يصحا و يحس بجرمه و يستعيد ذكرياته

و يفتكر سيرة اهله اللي منيلة بنيلة " خلينا ساكتين ان الله حليم ستار "(ايموشن واحد بيستعبط)

و يحس انه و لا حاجة

و يفتكر انه فعلا كائن ذو قرون و ذيل

يقوم فاتح درج الكتب

و يطلع مسدسه الكولت بايثون ماسورة 2"

و يحط جوا العجلة بتاعته طلقة واحدة من عيار ماجنوم 357.

و يتجه الى الجاكوزي اللي في المكتب "برضه من اضافات سمير رجب العظيمة للجمهورية "

و يحشر ماسورة المسدس في سقف زوره

و يبدأ يلعب روليت روسي و يلف العجلة  ويستنى الرصاصة تطلع و هوا بيستعيد ذكرياته الأليمة

و فجأة

بوووووووووووووووووووووووووم

و يدخل عليه سكرتيره بعد سماع صوت الطلقة المدوي

ليجده و قد انفجرت رأسه و تحولت رغاوي الجاكوزي للون البمبي

دة بعدكوا

الراجل عارف انه منافق

و اننا كارهينوا و مبسوط بكدة

عارف انه بيضحك علينا و عارف اننا عارفين اننا بيضحك علينا

موضوع التظاهر بقا نوع من العبث الصراحة

كمان شوية هنلاقي مظاهرات احتجاج على ممتاز القط

:((((

_________________

ملحوظة:

 في 10 اتقبض عليهم في اسكندرية من قدام مقر الجمهورية اثناء المظاهرة

منهم ناس من 6 ابريل و غيرهم و لسة لم يستدل عليهم

ربنا يفك كربهم

ادعولي برضه ميطلعش عين اهلي في امتحان شفوي بتاع بكرة

و دي حتة حشيش ملناش دعوة بيها نياههها

صلاة الجمعة النهاردة كانت حافلة بالأحداث
اامام الجامع اتكلم عن 3 محاور النهاردة
1- طاعة اولي الامر
2- تحريم التجمهر و التظاهر لأنه يلهي عن ذكر الله (اة و الله راجل طيب اوي)
3-ان لبس اللون الأسود بدعة و ليس له اصل في الدين و كل بدعة ضلالة و كل ضلالة نار يعني هتتحرقوا هتتحرقوا يا ولاد التيت و خلي اللون الأسود ينفعكوا نياههها


بعد نص ساعة من الهراء المتتالي دة
 قابلت اصدقاء ليا مشفتهمش من زمان 
 و بما انهم من اصحاب الخبرة الطويلة في مجال المخدرات و التعاطي و من اصحاب السيرة و السلوك السئ
سألتهم عن قصة خالد الله يرحمه
و قلتلهم لو حد منكم في مكانه كان  هيبلع لفافة بانجو عشان المخبر دخل عليه
طبعا كلهم بصولي باستغراب و
و قالوالي اية الهذيان اللي انت بتقولوا دة
لأطبعا كنا هنسقط
فتحت بوقي زي الأهبل  قلتلهم تسقطوا
انت بتتكلموا عن اية بالظبط يا رجالة
قالولي اللفافة كنا هنسقطها
يعني نرميها على الأرض و محدش ليه حاجة عندنا
و دة شئ بديهي يعلموا اي مبتدئ
و طبعا الناس دي مبتجيبش كلام من دماغها دي ناس دارسة و فاهمة هيا بتقول اية كويس
و طبعا جاء الأستدلال العلمي من فيلم احمد زكي "ضد الحكومة " و الله الفيلم هوا اللي اسمه كدة ماليش دعوة انا
و قال صديقي بكل ثقة في ذاته
انه في الدقيقة 14 و 10 ثواني يظهر ظابط المباحث و يطلب من احمد زكي تفتيش الشنطة بتاعته
و يطلب منه احمد زكي اذن النيابة فيقدمه له الظابط
و هنا يبدأ زكي بتفريغ محتويات الشنطة من اموال و ملابس و مستندات و عندما يصل الى قطعة الحشيش يقوم بالقائها بعيدا
قائلا:
" و دي حتة حشيش ملناش دعوة بيها"
و يقوم الراجل اللي جنبه ضاحك ضحكة مريــــــــــــــــــعة و يصقف
و يغادر الظابط قفاه يقمر عيش

اللقطة في الددقيقة 4:00 من الفيديو

طيب قلتلهم حسب بيانات الداخلية و تقرير الطب الشرعي فخالد  ضليع في التعاطي و له سوابق مخدرات و من عتاة الأجرام
قالولي طيب اثبتوا ازاي انه متعاطي
قلتلهم تقرير الطب الشرعي قال ان عنده نسبة من الترامادول
هنا تعالت صيحات الأستهجان هوا الترامادول دة مخدرات يا عم انت هتهزر دة كدة فور فن يعني مبقاش الا الفراولة هتخلوها مخدرات
قلتلهم و لسة قالوا برضوا ان كان فيه نسبة من الحشيش
هنا اصيبوا بصدمة شديدة و فتحوا افواههم في نف ذات اللحظة و قالوا
حـــــــــــــشـــــــــــــــــيـــــــــــــــــــش
لا حول و لا قوة الا بالله
حشيش اية بس اللي غلبان دة هيكون شربوا
هوا فيه حشيش اصلا في البلد يا كفرة
دة احنا بقالنا اسبوع واخدين اجازة و متفرغين للبحث عن الستاف باي شكل من اشكاله  و مفيش فايدة
و يقولولك انه لقوا حشيش في معدته
يعني بياكله
اة يا ظلمة يا كذابين
التضليل و صل للدرجة دي
طبعا بعد ما وصلوا للحالة دي من الغضب اضطريت اسيبهم يهاتوا مع نفسهم و هما بيتحسروا على الحشيش المفقود
و ارجع احشش من الكومينتي انا بقا لوحدي:(((((((((((((((((

حداد على خالد سعيد

 حداد على خالد سعيد (قتيل الطوارئ)

رحمة بالمتظاهرين و الأمن

قصة كل مظاهرة و وقفة احتجاجية

الدنيا حر و هنفطس

و ابن الهابلة الي منظم اليوم يختار الساعة 5 في عز الحر زي مظاهرة الحد اللي فات و نشوف النجوم في عز الظهر

و المن مش امحلك تتحرك و نازلين من الساعة 8 الصبح مأمنين المكانو روحهم في مناخيرهم

و يقولك بتعطلوا المرور و مصالح الناس و القصص الهابلة دي لو في التحرير

او زي الجمعة اللي فاتت و اللي هيحصل الجمعة الجاية برضه

لما تيجي تقف على الكورنيش

تتفاجئ ان وزارة الداخلية قررت عمل رحلة لموظفيها على ضفاف النيل

و لما تيجي تروح ناحية الكورنيش تتزق و تتضرب و يحسسوك ان هما بينتظروا ظهور الضفادع البشرية اللي هتقلب نظام الحكم من وسط النيل
مش موضوعنا
طيب بدل ما نسحل نفسنا و نحل الأمن معانا
لية منعملش مكان للتظاهر في جنينة اة و الله جنينة حلوة لطيفة جوها ظل و جميل
حتى لو في اتنين بيحبوا و لا حاجة ينزلوا معانا و اهو منه تظاهر و منه داتينج عادي يعني مفيش مشاكل
و عشان كدة انا اخترت مكان و لا احلى
حديقة العاشر من رمضان بالحي السابع مدينة نصر تقاطع مصطفى النحاس بشارع الطيران قصاد مطعم البرج(جروب التراس وايت نايتس الخاص بنادي الزمالك كان بيعمل اجتمعاته هناك)
طبعا مميزات لا حصر لها
اولا: جنب البيت عندي بدل بهدلة وسط البلد و الحوارات دي
ثانيا:المكان لطيف جدا و الوصول ليه بمواصلات من اي حتة و لا اسهل

شوفو الصورة الجميلة دي

رابعا:سهل جدا الميديا تجيلك هناك و تغطي الأيفنت اللي انت عامله مش حوار يعني دي مدينة نصر ام الدنيا اصلا

خامسا:لما تونون و تبقا جعان بدل ما تلف وسط البلد في رحلة شاقة للبحث عن الغذاء قدامك مطعم البرج حسبة 100 150 جنية تبقى بيس خالص

لو العملية مزنقة خطوتين و تبقا عند ارابياتا السابع و ابو رامي

طيب بقا بالنسبة للأمن اية المميزات

مش هيضطروا ينزلوا اصلا من بدري

عشان الموقع الاستراتيجي

 اولا:اي حد عنده خبرة بجغرافية مدينة نصر

عارف ان الناصية الجاية هيا حصن امن الدولة بمدينة نصر

المبنى الرهيب دة ربنا ما يكتب على حد دخوله

اللي تقريبا نص ميزانية البلد في تاريخ انشائه اتصرفت على الرخام اللي معمول منه المبنى من برة

و النص تاني عملوا بيه مطبات حواليه

ثانيا : فيه معسكرين للامن المركزي واحد في السابع و التاني في السادس

يعني هما 5 دقايق و يبقوا مشرفينا و بيدونا حقوقنا الدستورية في التظاهر

من اولا و ثانيا الأمن هينزل قبلها بنص ساعة يخلص الحوار و لا وجع قلب و لا قرف و وقوف من 8 الصبح

و انت هيتقبض عليك خلال نص ساعة و تكون مشرف في زنزنتك يعني لا هتتخنق في عربية ترحيلات و لا غيره

معا من اجل هايد بارك مصر في الحي السابع

اخترناه

من روائع الغناء العربي

القيت فيها تعاويذ خاصة فلا تعلم السر الأبداعي بها

كنت في احد التدوينات السابقة

سابقة اية صحيح دة هما كلهم على بعضهم 2 اصلا و دي التالتة انا شكلي بهس

المهم انا قلت اني هتكلم عن الر المكنون في القطعة الفذة دي

و قصتي معاها ابتدت السنة دي

في ايميل كان جايلي من جهة غير معلومة فيه لينك للاغنية دي على اليوتيوب

بصراحة اول ما فتحت اللينك اتاخدت بالناس اللي بتصقف دي و الصراحة اتخضيت

بعد كدة لقيت واحدة مسهوكة بتغني كدة ووراها شلة قاعدة تقول اخترناه

بصراحة مع تتابع الجمل انا بدأت افقد السيطرة على اعضاء جسمي خاصة في الحتة بتاعت و دة تكليييف مش تشريييييف

و لقيت نفسي قمت من على السرير و ابتديت اؤدي رقصات غريبة تشبه رقصة المطر عند القبائل الهنود الحمر

و بعديها دخلت عليا الصدمة العاطفية المهولة بتاعت راجل كدة صوته زي ما بيقول بتوع الانف و الاذن hot potato voice

 معرفش اية علاقة البطاطا السخنة بالصوت عشان الصوت يتوصف بيها بس دكاترة الانف و الأذن بيقولوا كدة

لقيته بيقول قاعدين على المسطبة ويااااااااااااااااااااااااه

انا ساعتها انشكحت انشكاحة فظيعة

بعديها جت بت مسرسعة بتقول البير و غطاااااه و كله صراااااحة

خلتني احس احساسات غريبة كدة

المهم بعد انتهاء الاوبريت المهيب دة انا عمل ما فقت من الصدمة كنت قايم مشغله تاني  و معلي على الصوت على الاخر

و قمت اؤدي الرقصة بتاعت المطر السابق ذكرها

بس ساعتها لقيت اختي الصغيرة جاية تؤدي نفس الرقصة الشعائرية لا اراديا

و الجيران و الدنيا اتقلبت حتى جيرانا عندهم جدتهم ست عجوزة مشلولة لقيناها جاية تشاور اخترناه اخترناه هيا كمان

شفتوا قد اية الوبريت مأثر في الناس

المهم انا افتكرت اني ناز مع اصحابي رايحين مشوار

بس ساعتها قلت ازاي يا واد يا محمد هتمشي من غير ما تسمع الأبداع دة تاني

ساعتها نزل عليا الوحي الالهي و قمت محول الأغنية ام بي 3 و واخدها على الموبايل

و قمت مشغلها مع ااصحابي في العربية

و فجأة دخلنا في نفس النوبات الهيسترية و حالة النبساط و الندهاش المفاجئة اللي عاملة زي التسمم بالأتروبين دي

و فتحنا الشبابيك لنور الشمس بقا و علينا الصوت على الأخر

شمس اية صحيح احنا كنا بالليل

مش مهم دي كلها شكليات

هدا من جنبينا موتوسيكل بتاع دليفري و اول ما سمع الابداع اللي بيشع من العربية

قام رافع ايده و قعد يقول اخترنااااه اخترناااااه

و بعدين طاااااااااااااااخ بووووووم طيييييييييييييييييييييخ

الراجل لب في الرصيف

بصراحة  ساعتها انا فقت اخيرا من الاغنية و القلق كان هيموتني

اصل لو الكل نازل معاه بيبي ماشين (يعني في كوبايات كرتون مش في كانز) اكيد اكيد هيتدلق على الأكل و يبوظوا

و دي حاجة تقهر يعني  اوردر كوك دوور متكلفله بتاع 100 120 جنية يتبل كدة

ما علينا كملنا مسيرتنا المظفرة لحد كوبري العباسية

و هناك خير اللهم اجعله خير لقينا لجنة

و احنا داخلين معليين الصوت و النور العالي والع و داخلين على الظابط بنقول و لا هيديني و لا يرقيني الخخخخخخخخخخخخ

بيقولنا هيديكوا اية يا ولاد تتتتتتتتتتتتتتتتتتتتتتتتتتتتتتتتتتيييييييييييييييييييييييييييييييييييييييتتتتتتتتتتتتتتتتت

الرخص و بطاي............... و فجأة اصاب وشه بالشلل اة يا عيني كبد امه

و لقيناه بيكمل الكوبليية معانا  و عشااان كدة احنا اخترناااااااااااااااااااااااااااااااااه

وو قام  باعت معانا موتويطل من بتوعهم اللي بيعملوا عنننننننننن عنننننننننننن

عشان يرافقنا الى مثوانا الأخييييييير

قصدي الى المكان اللي احنا رايحينه

بس كدة

و عشان كدة احنا اخترناااااااااااااااااااااااااااااه

تعاطفا مع مصر ...لوووول احنا صعبنا على اليهود "مخطط صهيوني اوعا تصدقوهم"

اة و الله فاكرني بهزر
احنا صعبنا على اليهود تخيلوا
كدة
عارفين لما واحد يقول للتاني دة انت حالك يصعب على الكافر
لأ
دة على يهود اسرئيليين
ايوة العالم ولاد التيت دول
اللي كل يوم بيموتولهم 30 40 عيل فلسطيني و يهدوا كام حي على دماغ اهاليهم و مفيش مانع يجوعو الافات كام يوم
او يقطعوا كهربا عن مستشفى لحد ما عيانين الرعاية تفيص
و ينامو اخر الليل بضمير مطمئن
تخيلوا العالم التيييييييييييييت دي صعبنا عليهم
اكيد فيه ان
دي عالم مكارة
اكيد عايزين يكرهونا في اللي بيحبنا و بنحبه

في اثناء التعليق على احد التدوينات شفت لينك ارسله صاحب المدونة ليا
و كان عن تمنيات صحفي اسرائيلي اسمه

Aluf Benn

و بما ان اللغة العبرية قريبة من العربي اعتقد و الله اعلم انه ينطق بن حلوف يعني ابن الحلوف

"ملاحظة اسلوب الصحفي دة يشبه اسلوب مستر اكسلانت كات بتاع اخبار اليوم يمكن يكون فيه صلة قرابة و حلوف و كات اهي كلها حيوانات"

المهم المقالة دي كانت دعوة للشعب الأسرائيلي كي يصلي من اجل سلامة الرئيس مبارك ايام العملية

ما علينا اكيد العالم ولاد التيت دول عايزين يكرهونا في رئيسنا حبيبنا

فيقوموا قال اية قال اية

يعملوا لن هما بيحبوه بس هما من جوا نفسنيتهم مش بيحبوه

شغل يهووود يا اخوانا

اوعوا تتخدعوا

دول اكتر ناس يتمنو الشر بحبيبنا

اكيد الراجل مطلع عينهم

مسيطر على منابع النيل محدش عارف يعمل حاجة هناك

غاز قاطعوا عنهم خالص

لدرجة ان هما بيطبخوا بالخشب اة يا عيني مفيش غاز عندهم خالص



بس اية بيمكروا بينا زي الثعلب المكار ابو ديل دة

لأ و اللي يزيد و يغطي التعليقات

ان في يهود هبل مفهموش اللعبة و رايحين يشتموا فيه

اة الكلاب و لاد الكلاب

في التعليقات بيقولوا علية ديكتاتور

شوف يا اخي المؤامرة بتاعتهم باظت وجم اسرئيليين زي الحلوف اللي كاتب المقال يشتموا فيه و يظهروا الكراهية اللي كاتب المقال المكار كان بيخفيها
و ييجوا زي العبطا يبوظوا المؤامرة بتاعتوا شوف التعليقات قال اية بيقولو علية ديكتاتور
زي التعليق دة و بيقمع الشعب بتاعه فين دا يا كفرة

Praying for a dictator????
Allegra
26.05.10
10:13
Am I dreaming, or is the author of this offensive article asking us to pray for a dictator who uses torture in his prisons, has been ruling Egypt without free elections for half a century, and systematic emprisons all his secular opponents? Are we going to be asked to pray for Kim Jung Il and Kadhafi as well


و لا الأهبل اللي بينتقد اوباما انه موقفش ممارسات النظام المصري الوحشية
و قال اية عندنا قانون طوارئ
اة يا ولاد الكدابة فين دة
Mubarak Regime
Gautam
26.05.10
10:01
Well, USA and Israel seem to be doing all they can to maintain a brutal dictatorship in Egypt. What happened to USA's agenda of bringing democracy to the middle east?? "Obama on't repeat the mistakes of Jimmy Carter, who encouraged the fall of the Shah over the issue of human rights" This shows blatant disregard for human rights from the US administration towards other nations

فين دا يا كداب
طيب عيني في عينك كدة




ااااااااااااااااااة يا عيني يا حيوان مش كدة انت صدقت و لا اية

فشوفوا يا احبائي ازاي اليهود
بيوقعونا في الغلط و بيكرهونا في حبيبنا عن طريق اظهار ان هما بيحبوه و هما من جوا نفسياهم مش بيحبوه
و لكن يشاء العلي القدير ان يظهر بني جلدتهم الكره له
لتعود ثقتنا فيه التي لم تذهب اي حتة اصلا هيا تستجري دة ان كنت اقطع لها رجلها الفاجرة دي
و نهاية احب اختم باغنية اخترناه عشان اكيد الأعادي
صحيح الأغنية دي سبحان الله فيها قوة غريبة
تحس ان اللي ملحنها عفريت و حاطط فيها سحر غريب
و لا اقولكوا نخلي الكلام عن الرائعة الفنية السحرية دي لتدوينة تانية
كفاية كدة

الحور العين و العالم اللي بتحور

النهاردة في خطبة الجمعة

الخطيب قرر اخيرا يتكلم عن الجنة

طبعا دة بعد شهور من خطب عذاب القبر و اللسوعة في جهنم

و وصل بينا لحالة من الأمل رهيبة رهيبة يعني

يعني الواحد كان بيفكر الطابق بتاعه في جهنم هيبقا مع ابو جهل و لا مع ابو لهب

ما علينا نخلي موضوع جهنم دة ليوم تاني

المهم الخطيب متعرفش كان ماله النهاردة العملية كانت سخنانة معاه

و ساب كل حاجة و قفش في اية

نساء اهل الجنة

وعينك ما تشوف الا النور الراجل

الأسرائليات اشتغلت و احاديث متعرفش جايبها منين

دة غير الصحيح منها بيفسرها تفسيرات زي الفل

و لا تفسيره للأيات

و يقولك اهم ميزة في الحور العين

مبينكدوش على اجوازهم و لا ليهم طلبات

لا يا راجل يعني في الجنة هتقوله عايزة قزازة زيت و لا نص كيلو لحمة يا اخي ***

و لا ساعة الوصف الجسدي جايب كلام الله اعلم جابه منين

المهم انه قعد يوصف وصف عجيب

بس المشكلة ان حسب الاوصاف اللي بيقولها دول المفروض يبقوا في جهنم يعذبوا بيهم الكفار يا عمنا

الراجل فتى فتي عجيب و الظاهر بيوصف من دماغه

لازم يعني تبقا بيضا و مليانة يعني لا و اهم حاجة بيوصف النقاب بتاعهم

لا و النبي نقاب

لية با اخويا هيا مشاشية في عباس العقاد و خايف من الفتنة على رأيك

بيوصف بمزاجه و غالبا و الله اعلم ذوقه في الحريم مش قد كدة على رأي واحد صاحبي منحرف شوية

طيب هما لية مستواهم كدة

لية ميتكلمش عن قضية اللنيل و المحافظة على الماء؟

لية ميتكلمش عن تعاملات الناس الزفت؟

لية ميتكلمش عن النظافة الشخصية اللي بقت حاجة مقتقدة في الناس؟؟ اة و الله الناس ريحتها بقت تقرف

يا فرحتي بوصف الحور العين و التحوير اللي انت بتحوره

نختم بخطيب برضه كدة الله يكرمه

كان بيقولك عن ان واحد من السلف الصالح يا عيني غلبان

طالع يحج و مماعهوش الا 1000 جنية

انا الصراحة اتأثرت اوي

و بعدين قلت سلف اية و الف جنيه اية

الراجل دة بيشتغلنا دة ولا اييييييييييييييييييييييييييية

شوية مدرسين عربي منهم لله مسحوا الاسلام من صدور الناس

و اختصروه في احكام دخول الخلاء